Tuesday, December 1, 2009

Biogas Ser Ning


Mah le innchungkhar cio in caw-eek, vok eek in biogas (gas rawlchumhnak) tuah ning a si. Tengki pung i thumchuahkhat tiang hrawng in eek kha ti he a ti hrup in cawhmi kha rawn. A cunglei ah kua fa te in khairiat peep hruk i pit te in phih ding. Mah peep paarlei kha gas stove (gas lungthu) ah hei peh ding a si ko cang. Mah khakhan rawl cu a chumh ko lai.Eek rawn hnu zarh khat hrawng ah gas a chuak lai. Rawl lecangka in gas a chuak colh lo. Minung 5 khuasa caah ni khat ah minit 20 na hman ahcun thla khat a nguh. Tengki pung 2 hrawng nai hunh ahcun cat lo te in gas na hman khawh lai.

Saturday, March 14, 2009

TABC zung le Thantlang khua




Khawika hmun le ram kan phanh zong ah kan semnak Lairam, Thantlang khua te cu kan philh kho bal lai lo. Zei Tikir lai le lungrawn khua ah tlawnlen khawh thannak lawng kan tuah ko. Kan nih laimi a tam u kan ruahnak belte ah thiltha kan hmuh tikah kan semnak khua ah zeitindah ka tuah ve lai, kan phanhter ve lai ti hngak in thil tha kan hmuhnak hmun tu ah pem kan i timh cawlhmi bel hi ruah awk ngai a si.


Miphun lian ngan hna cu chan zei zat sal an tan ah siseh, ram tha ah thil tuah kho le thil ti kho an si zong ah a donghnak ahcun an thil ti khawhnak le an pum cu an ram caah a si tawn. A tlaumi miphun tu bel cu mah chuahnak ram kha philh in an phanhnak ram ah an i nuam i an miphun sinak zong an i tlau pi chih tawn. Nang teh Laimi phun sinak in na tlau lan lai maw? Na ram laitlang caah zei dah na tuah ve cang, na lu hi na chuahnak hmun ah phun nai tim kho lai maw?


Nan Semnak Lairam nih na kir than ding ni te kha an hngak peng ko, na kir le kir lo cu nangmah nawl a si. Mi vawlei cu na ram a si kho taktak lai maw? Kan semnak Lairam na van ruah khawh thannak ah zei maw zat lai tlang lei hmantlak kan van cuan ter, hi tal nih lai ram kir thannak lung thin i pe than ko se.

Friday, February 13, 2009

TABC kan pastor thing ( Thau pastor thing ) Rev. Dr. C. Duh Kam cu America in Malaysia ramah a kan tlawn lio pi a si. America in February 7, 2009 ah Kuala Lumpur ah a phan. Chin Christian Fellowship Centre ah ai thum, Feb 8, 2009 chun pumh ( CCF Imbi chapel ) phung a kan chim. Atu hi a hawi le ABC ( America Baptist Church ) in General Secretary Alex Roy Medley le ABC chungtel Steve VanOstran, Jeffrey Haggray, Edwin Hobart, Peter Bogelaar, Florence Li, Mark Caruana cu Laimi ( Chin ) refugees pawl umto ning zoh ah an rat lio pi a si. February 12, 2009 ni kha Kuala Lumpur an phan; February 15, 2009 zan lei 6:00 pm ah an umnak ah an kir than lai. CCF biak inn hmun (5); CCF Imbi, CCF Cheras, CCF Sungai buloh, CCF Klang, CCF Puchong biak inn ah mirang kan khual pawl cu phung an chim cio lai.

Sunday, February 8, 2009


Dear Lairam a dawtu hna,

TABC lairam hi mizapi nih ttial le rel i thawk cang hna u sih ti in hi kan web hi tu chun Feb 09, 2009 ni in kan thawh,Hmantlak a cuangmi hi Hakha le Thantlang kar Tita hotel kamte Tita kuang zawn asi, ca ttial a duh mi paoh, tabclairam@gmail.com ah pek khawh a si i, cu nan ttialmi cu hi http://www.tabclairam.blogspot.com/ in kan in thanh piak hna lai. Kan miphun ca ttial ding in kan in sawm hna,

Tawi dornak he,

Tawlreltu